Audi tellus, audi magni maris limbus, audi omne quod vivit sub sole: hujus mundi decus et gloria quam sint falsa et transitoria, ut testantur haec temporalia non in uno statu manentia. Nulli valet regalis dignitas, nulli valet corporis quantitas, nulli artium valet profunditas, nulli magnae valent divitiae, nullum salvat genus aut species, nulli prodest auri congeries. Transierunt rerum materies ut a sole liquescit glacies. Ubi Plato? Ubi Porphirius? Ubi Tullius aut Vergilius? Ubi Thales? Ubi Empedocles, aut egregius Aristoteles? Ubi Alexander? Ubi rex maximus? Ubi Hector, Trojae fortissimus? Ubi David, rex doctissimus? Ubi Salomon prudentissimus? Ubi Absolon pulcherrimus? Cum Helena Paris pulcherrima? Transierunt legem mortalium per unius momenti spatium ceciderunt in profundum ut lapides, quis scit an detur eis requies? Sed tu, Deus, rector fidelium, fac te nobis semper propitium cum de malis fiet judicium.
https://primanota.net/orlando-di-lasso/audi-tellus-lyrics.htm