Johannes Roullet - Laus tibi Christe - текст песни (слова)

Laus tibi, Christe, qui es creator et redemptor, idem et salvator 
 Cœli, terræ, maris, angelorum et hominum,
 Quem solum Deum confitemur et hominem.
 Qui peccatores venisti ut salvos faceres,
 Sine peccato peccati assumens formulam.
 Quorum de grege, ut Chananæam, Mariam visitasti Magdalenam.
 Eadem mensa Verbi divini illam micis, hanc refovens poculis.
 In domo Simonis leprosi conviviis accubans typicis,
 Murmurat pharisæeus, ubi plorat, fœmina criminis conscia.
 Peccator contemnit compeccantem, peccati nescius poenitentem exaudis, emundas fœdam, adamas, ut pulchram facias.
 Pedes amplectitur dominicos, lacrymis lavat, tergit crinibus, lavando, tergendo, unguento unxit, osculis circuit.
 Hæc sunt convivia, quae tibi placent, o Patris Sapientia.
 Natus de Virgine qui non dedignaris tangi de peccatrice.
 A pharisæo es invitatus, Mariæ ferculis saturatus.
 Multum dimittis multum amanti, nec crimen postea repetenti.
 Dæmoniis eam septem mundas septiformi Spiritu.
 Ex mortuis te surgentem das cunctis videre priorem.
 Hac, Christe, proselytam signas Ecclesiam, quam ad filiorum mensam vocas alienigenam.
 Quam inter convivia legis et gratiæ spernit pharisæi fastus, lepra vexat hæretica.
 Qualis sit tu scis, tangit te quia peccatrix, quia veniæ optatrix.
 Quidnam haberet ægra, si non accepisset, si non medicus adesset ?
 Rex regum dives in omnes, nos salva, peccatorum tergens cuncta crimina, sanctorum spes et gloria.