Conditor alme siderum, aeterna lux credentium, Christe, redemptor omnium, exaudi voces supplicum. Qui condolens interitu mortis perire saeculum, salvasti mundi languidum, donans reis remedium. Vergente mundi vespere, uti sponsus de thalamo, egressus honestissima Virginis matris clausula. Cujus forti potentiae genu curvantur omnia; caelestia, terrestria nutu fatentur subdita. Te, Sancte, fide quaesumus, venture judex saeculi, conserva nos in tempore hostis a telo perfidi. Virtus, honor, laus, gloria Deo Patri cum Filio, Sancto simul Paraclito, in saeculorum saecula. Amen.