Anonymous - Aurea luce - текст песни (слова)

Aurea luce et decore roseo,
 Lux lucis, omne perfudisti sæculum:
 decorans cælos inclito martyrio.
 Hac sacra die, quæ dat reis veniam.
 
 Janitor cæli, doctor orbis pariter,
 Judices sæcli, vera mundi lumina:
 Per crucem alter, alter ense triumphans,
 Vitæ senatum laureati possident.
 
 Jam, bone Pastor Petre, clemens accipe
 Vota precantum, et peccati vincula
 Resolve, tibi potestate tradita,
 Qua cunctis cœlum verbo claudis, aperis.
 
 Doctor egregie, Paule, mores instrue,
 Et mente polum nos transferre satage:
 Donec perfectum largiatur plenus,
 Evacuato quod ex parte gerimus.
 
 Olivæ binæ pietatis unicæ,
 fide devotos, spe robustos maxime,
 fonte repletos caritatis geminæ
 post mortem carnis impetrate vivere.
 
 Sit Trinitati sempiterna gloria,
 honor, potestas atque iubilatio,
 in unitate, cui manet imperium
 ex tunc et modo per æterna sæcula