Anonymous - A solis ortus cardine - текст песни (слова)

A solis ortus cardine
 Adusque terræ limitem
 Christum canamus Principem,
 Natum Maria Virgine.
 
 Beatus auctor sæculi
 Servile corpus induit,
 Ut carne carnem liberans
 Non perderet quod condidit. 
 
 Clausæ parentis viscera
 Cælestis intrat gratia;
 Venter puellæ baiulat
 Secreta quæ non noverat. 
 
 Domus pudici pectoris
 Templum repente fit Dei;
 Intacta nesciens virum
 Verbo concepit Filium.
  
 Enixa est puerpera
 Quem Gabriel prædixerat,
 Quem matris alvo gestiens
 Clausus Ioannes senserat.
 
 Foeno iacere pertulit,
 Præsepe non abhorruit,
 Parvoque lacte pastus est
 Per quem nec ales esurit.
  
 Gaudet chorus cælestium
 Et Angeli canunt Deum,
 Palamque fit pastoribus
 Pastor, Creator omnium.
  
 Iesu, tibi sit gloria,
 Qui natus es de Virgine,
 Cum Patre et almo Spiritu,
 In sempiterna sæcula.
 Amen.