AY, besherewe yow, be my fay, This wanton clarkes be nyse all way ; Avent, avent, my popagay ! What, will ye do no thyng but play ? Tully valy, strawe, let be, I say ! Gup, Cristian Clowte, gup, Jak of the vale ! With, Manerly Margery Mylk and Ale. Be God, ye be a praty pode, And I loue you an hole cart lode. Strawe, Jamys foder, ye play the fode, I am no hakney for your rode ; Go watch a bole, your bak is brode ! Gup, Cristian Clowte, gup, Jak of the vale ! With, Manerly Margery Mylk and Ale. I wiss ye dele vncurtesly ; What wolde ye frompill me ? now, fy ! What, and ye shalbe my piggesnye ? Be Crist, ye shall not, no hardely ; I will not be japed bodely ! Gup, Cristian Clowte, gup, Jak of the vale ! With, Manerly Margery Mylk and Ale. Walke forth your way, ye cost me nought ; Now haue I fowned that I haue sought, The best chepe flessh that euyr I bought. Yet, for His loue that all hath wrought, Wed me, or els I dye for thought ! Gup, Cristian Clowte, your breth is stale ! Go, Manerly Margery Mylk and Ale ! Gup, Cristian Clowte, gup, Jak of the vale ! With, Manerly Margery Mylk and Ale.
https://primanota.net/william-cornysh/mannerly-margery-milk-and-ale-lyrics.htm