Intemerata Dei mater, generosa puella, milia carminibus quam stipant agmina divum, respice nos tantum, si quid jubilando meremur. Tu scis, virgo decens, quanti discrimine agatur exulibus, passimque quibus jactemur arenis. Nec sine te manet ulla quies spes nulla laboris, nulla salus patriae, domus aut potiunda parentis cui regina praees, dispensans omnia; laeto suscipis ore pios dulci quos nectare potas et facis assiduos epulis accumbere sacris. Aspiciat facito miseros pietatis ocello Filius, ipsa potes; fessos hinc arripe sursum, diva, virgo manu, tutos et in arce locato.
https://primanota.net/johannes-ockeghem/intemerata-dei-mater-lyrics.htm