Jacobus Clemens non Papa - Blaison du laid tétin - текст песни (слова)

Tetin, qui n'as rien, que la peau, 
Tetin flac, tetin de drapeau, 
Grand' Tetine, longue Tetasse, 
Tetin, doy-je dire bezasse ? 
Tetin au grand vilain bout noir, 
Comme celuy d'un entonnoir, 
Tetin, qui brimballe à tous coups 
Sans estre esbranlé, ne secoux, 
Bien se peult vanter, qui te taste 
D'avoir mys la main à la paste. 
Tetin grillé, Tetin pendant, 
Tetin flestry, Tetin rendant 
Vilaine bourbe au lieu de laict, 
Le Diable te feit bien si laid : 
Tetin pour trippe reputé, 
Tetin, ce cuydé-je, emprunté, 
Ou desrobé en quelcque sorte 
De quelque vieille Chievre morte. 
Tetin propre pour en Enfer 
Nourrir l'enfant de Lucifer : 
Tetin boyau long d'une gaule, 
Tetasse à jeter sur l'epaule 
Pour faire (tout bien compassé) 
Ung chapperon du temps passé ; 
Quand on te voyt, il vient à maints 
Une envye dedans les mains 
De te prendre avec des gants doubles 
Pour en donner cinq ou six couples 
De soufflets sur le nez de celle 
Qui te cache sous son aisselle. 
Va, grand vilain Tetin puant, 
Tu fourniroys bien en suant 
De civettes et de parfums 
Pour faire cent mille deffunctz. 
Tetin de laydeur despiteuse, 
Tetin, dont Nature est honteuse, 
Tetin des vilains le plus brave, 
Tetin, dont le bout tousjours bave, 
Tetin faict de poix et de glus : 
Bren ma plume, n'en parlez plus, 
Laissez-le là, veintre sainct George, 
Vous me feriez rendre ma gorge.