Gilles Velut - Summe summi - текст песни (слова)

ORATIO DEVOTA AD DOMINUM JESUM ET B. MARIAM MATREM EJUS.
 (Saint Bernard de Clairvaux)
 
 Summe summi tu Patris unice,
 Mundi faber et rector fabricæ,
 Pietatis respectu deicæ,
 Peccatores afflictos respice,
 Pie Pater.
 
 Summa summi tu Mater Filii,
 Clavem nostri tenens auxilii,
 Fove tui lacte consilii
 Peregrinos hujus exsilii,
 Pia Mater.
 
 Consolentur, o bone Domine,
 Respirantes in tuo nomine,
 Qui pro mundi tollendo crimine,
 Dignatus es nasci de virgine,
 Matris Pater.
 
 Consolentur, o bona Domina
 Sitientes tua solamina,
 De qua sola felice femina
 Prædicantur hæc duo nomina,
 Virgo Mater.
 
 O figura Patris substantiæ!
 Tu es splendor paternæ gloriæ,
 Tu es verum lumen justitiæ,
 De quo manat totius gratiæ
 Plenitudo.
 
 O Regina regni Davidici!
 Tu es virga floris Dominici!
 Tu es arca panis angelici,
 De quo nostra meretur refici
 Solitudo.
 
 Virtus Patris et sapientia,
 Suaviter disponens omnia,
 Tu et Pater una substantia,
 Æquus honor, eadem gloria
 Est utrique.
 
 Stella maris, Regina sæculi,
 Tu es Mater illius parvuli,
 Quem adorant fideles populi,
 Semper omnes et semper singuli,
 Et ubique.
 
 O sanctorum Sancte mirabilis,
 Toti mundo desiderabilis,
 Homo potens et Deus humilis:
 Non est tibi nec erit similis,
 Deus meus.
 
 O sanctarum sancta dulcissima,
 Sola tanto partu dignissima,
 Ut de tua carne mundissima
 Nasceretur majestas maxima,
 Homo Deus.
 
 Jesu Christe, fons indeficiens,
 Fons humana corda reficiens,
 Te suspiro, te solum sitiens:
 Solus eris mihi sufficiens,
 Fili Dei.
 
 Mater Christi, decus virgineum,
 Thronum sedens super æthereum:
 Nomen tuum sapore melleum,
 Liquefacit affectum ferreum
 Cordis mei.
 
 Summum bonum plenum dulcedine,
 Verum lumen de vero lumine,
 Solo cujus audito nomine,
 Satiatur mira pinguedine
 Cor justorum.
 
 Summi boni reclinatorium,
 Dulcis vini dulce cellarium,
 Quod indulcans dulcedo dulcium,
 Præelegit sibi in proprium,
 Rex coelorum.
 
 Patrum Pater præcelse cæteris,
 Reparator humani generis:
 O qui carnem pro nobis miseris
 Mulieris de carne pauperis
 Assumpsisti.
 
 Matrum Mater et Virgo virginum,
 Apotheca salutis hominum,
 O, quæ munda de carne Dominum,
 Sine carnis mixtura seminum
 Concepisti.
 
 Audi, precor, o qui das gratiam!
 Peccatoris hujus miseriam,
 Et per tuam misericordiam,
 Peccatorum meorum veniam
 Mihi dona.
 
 Audi, precor, o plena gratia,
 Peccatoris hujus suspiria,
 Et pro tua misericordia
 Deo meo me reconcilia,
 Mater bona.
 
 Tibi, Pater, fac beneplacitum
 Peccatoris istius gemitum,
 Solve mei reatus debitum
 Quia malum protendo meritum,
 Et protendi.
 
 Tibi, Mater, fac acceptabilem
 Peccatoris hanc vocem flebilem.
 Redde mihi Deum placabilem,
 Ne se præstet inexorabilem,
 Quem offendi.
 
 O intactæ Fili puerperæ,
 Audi planctus animæ miseræ,
 Quæ peccati jacens in pulvere,
 Ut jumentum se computrescere
 Lamentatur.
 
 O intacta Virgo puerpera.
 Ad te clamat mens mea misera,
 Quæ nefanda semper ad scelera
 Ab ætate nunc usque tenera
 Effrenatur.
 
 Pie Pater, errantem corrige,
 Piam manum labenti porrige,
 Jam de luto me fæcis erige,
 Et in viam tuorum dirige
 Mandatorum.
 
 Pia Mater, orantem visita,
 Pio corde de me recogita,
 Coram Jesu benigno clamita,
 Ut meorum remittat debita
 Peccatorum.
 
 Esto nobis, Pater, propitius,
 Quorum frater es atque socius:
 Te laudamus, te benedicimus,
 Adoramus atque diligimus
 Mente tota.
 
 Esto nobis, Mater, propitia,
 Quorum soror es atque socia:
 In tuarum laudum præconia,
 Corda nostra fac voluntaria,
 Ac devota.
 
 Benedicte Creator omnium,
 Benedicas mentes fidelium,
 Nomen tuum benedicentium,
 Mortis tuæ per beneficium
 Quos salvasti.
 
 Benedicta tu in mulieribus
 Benedic te benedicentibus,
 Benedictis tuis uberibus,
 Qui dat escam esurientibus,
 Quem lactasti.
 
 Laus et honor sit Dei Filio,
 Salus, virtus et benedictio,
 Benedicta sit incarnatio;
 Mors illius et resurrectio
 In æternum.
 
 Benedictus sit Pater luminu
 Benedicta sit Virgo virginum,
 Benedicat cor meum Dominum,
 Sitiatque fontem dulcedinum,
 Sempiternum. Amen.