O gloriosa Domina excelsa super sidera, qui te creavit provide, lactasti sacro ubere. Quod Eva tristis abstulit, tu reddis almo germine; intrent ut astra flebiles, Caeli fenestra facta es. Tu regis alti janua et porta lucis fulgida; vitam datam per Virginem, gentes redemptae, plaudite. Gloria tibi, Domine, qui natus es de Virgine, cum Patre et Sancto Spiritu in sempiterna secula. Amen.